Jakarta Tempo Doeloe

Encang encing, enya’ babe, abang ame empo’. Engga’ kerase ye.., Jakarte udeh ulang taon lagi, kote eni emang punye sejarah nyang panjang, mulaen dari jaman sunde kelape, terus berube name jadi Jayakarta (nyang berarti kote kemenangan) pas abis di bebasin ame Fatahillah (sala atu pahlawannye orang betawi). Terus abis diambil alih ame colonial Belande kote eni dirube namenye jadi Batavia. Baru abis Indonesia merdeka kote eni berube name jadi Jakarte nyang artinye same ame Jayakarta.

Dari pertame kote eni didiriin emang udeh jadi kote nyang penting, makenye engga’ aneh kalo dari jaman ke jaman, kote eni selalu aje dijadiin ibu kote ame pemerinte nyang berkuase waktu entu.

Suku nyang jadi penduduk aseli di Jakarte namenye suku Betawi, nyang Ane tau neh, ampe sekarang belom ade nyang tau secare pasti asal kate Betawi ade juge’ nyang kate, asalnye dari kate Batavia, selame mase kolonialisme emang name suku betawi saat entu belom nongol, baru deh abis kebangkitan nasional yaitu waktu ari sumpe pemude tanggal 28 oktober 1928, name suku betawi dikenal orang, nyang ngegerakin namenye Muhammad Husni Thamrin (pahlawan nasional nyang asalnye asli betawi). Kalo engga’ sale neh, name organisasinye Jong Batavia (Pemude Batavia atawe Pemude Betawi) eni kalo engga’ sale yee…, kalo sale.., ye…, maap-maap kate deh bang yee….

Tapi sebenernye suku eni udeh ade jau ari sebelomnye, tapi emang waktu entu belom bername. Adat istiadat suku eni dipengaruin ame budaye Arab (dalem hal eni Arab Yaman nyang lebi berpengaru), terus budaye Cine, ame Eropa (kaye’ contonye nih yee…Belande, Portugal), terus juge suku Moor dari Afrika, ame beberape suku local (contonye aje melayu, sunde, ame jawe). Campuran macem-macem suku eni nyang terus dikenal dengan suku dan adat istiadat betawi.

Tapi, bebarengan ame majunye jaman, bukan cuman suku betawi aje nyang ngediemin kote Jakarte, tapi sekarang macem-macem suku bangse nyang ade di Indonesia juge’ suku bangse dari dunie Internasional ade di Jakarte, orang dari Negare-negare Eropa, Asia, Afrika, Amerika Utare juge’ Selatan (atawe latin) gampang kite temuin di Jakarte. Entu soalnye kote eni ibu kotenye Indonesia.

Kote eni emang banyak nanggung beban penduduknye, banyak cerite orang berhasil di kote eni, tapi banyak juge’ cerite nyang sebaliknye, sehingge ade nyang kate “ibu kote lebi kejem dari ibu tiri”.

Tapi entulah Jakarte, banyak suke dukenye, banyak rekaman sejare dikote eni, mulaen dari orang-orang gedean kaye’ contonye Fatahillah, Pangeran Diponegoro nyang perne dipenjare di Balai kote (sekarang museum fatahilla), gubernur jendral Hindie Belande macem Van Den Bosh, Jean Peter Coen, Rafles, Deandels (nyang terkenal ame politik tanem pakse), terus juge’ Soekarno Presiden pertame RI sekaligus Proklamator RI juge ngejadiin kote eni jadi pusat pemerintahannye malahan sampe sekarang.

Kote eni juge’ nyang jadi saksi di umuminnye Proklamasi Indonesia.

Jakarte sekarang emang engga’ same lagi kaye’ Jakarte dulu, encang encing, enye’ babe, abang ame empo’, nyang brojolnye taon 60an ampe 80an, mungkin ngerasain banget, Ane kendiri’ brojolnye taon 80an, dulu di kampung Ane di Mampang Prapatan (sebeleh selatan Jakarte) masi adem banget, soalnye masi banyak pu’unan, lapangan bole, abis maen bole langsung dah pade ngejublek di bawa pu’un sawo sambilan minum aer kelape mude, tapi sekarang jem 10 pagi aje udeh panas. Kalinye juge’ udeh kotor, kalo ujan banyak nyang kebanjiran. Kate temen ane neh, “dulu di jakarte kite nanem biji rambutan, keluarnye pu’un rambutan, nanem biji duren keluar pu’un duren, tapi sekarang, nanem biji nangke nyang keluar malah biji beton”.

Yaah…, gitu deh jakarte sekarang, tapi biar pegimane juge’ Ane tetep cinte, demen ame kote eni.

Nyok dah pade-pade, kite jagein kote kite eni, kalo bukan kite sape lagi…, iye ga’, sodare-sodare……

Terakhir nih, sebelomnye Ane mo’ ngucapin Selamet ulang taon buat orang-orang Betawi, selamet ulang taon Jakarte nyang ke 481, kote nyang banyak dicintain orang.